أيام العزوبية

بسم الله الرحمن الرحيم
والصلاة والسلام على أشرف الأنبياء والمرسلين سيدنا ونبينا محمد وعلى آله وصحبه ومن تبعه بإحسان إلى يوم الدين
السلام عليكم ورحمة الله وبركاته

الله الله يا أيام العزوبية , أيام لا تحمل فيها هم أحد , فليس لي زوجه اهتم بها أو أطفال اعتني بهم , خالي من المسؤوليات تماما , وإذا كان لي هم , فهو أين اقضي إجازتي الأسبوعية , محتارا بين جده والمنطقة الشرقية أو الجنوبية , وعند السفر لا احمل سوى حقيبة واحده فقط بها كل شيء فرشة أسناني وعطر ومكينة حلاقه وغيارين وجزمتي أعزكم الله ومنشفتي وكم ثوب وشماغ وعقال وطاقية وتذكره واحده فقط ذهاب وعوده اصل إلى المطار في الوقت المناسب بدون تأخير واركب طائرتي بكل أريحيه وعند الوصول استأجر سيارة كتكوته نظيفة أهم شي قير توماتيك وبعدين أروح الفندق أو شقق

مفروشة وانزل على المسبح وبعدين اطلع على اللوبي اشرب قهوتي وبعدين أروح المطعم اخذ وجبتي وبعدين اطلع أقابل أصحابي على البحر نستأجر دباب بحري أو لنش أو نصيد سمك مثلا أو نروح مقهى شيشة وبعدين كم لفه في الشوارع وبعدين نطلع على مجمع تجاري وناخذ كم لفه , ارجع الفندق هريان وتعبان اخذ شور سريع ونومه زي العسل .

المهم انك دائما جاهز لأي فله وأهم شي نفسك
لكن الحمد الله رب العالمين
اقسم بالله يا عالم أول رحله مع المدام شهر العسل راحت عليه الرحله بسبب التأخير , وبعدين مرت علينا فتره حلوه بدون عيال لمدة سنه تقريبا كانت فيها الأوضاع مستقره نص من كذا ونص من كذا بس برضه كان فيه هم من اللي مستنيك بالبيت علما أن ما فيه أي مشاكل بس المشكلة إن المدام ما تنام حتى ترجع البيت ما تاكل حتى ترجع البيت , يوم الخميس أو الأربعاء أو الجمعة واحد منهم رايح عليك .
المهم بعدها اللهم لك الحمد والشكر ربي رزقنا بالأطفال ... ايوااااااا .... هنا الكلام.

حبيبي .... وانت راجع من الدوام جبلنا معك حفائظ , وبعد ما تشتري الحفائظ وتصير قريب من البيت ..... حبيبي جبلنا معك سيريلاك وحليب وإذا وصلت البيت تبي تتغدا تقولك المدام والله ما سويت غدا ...... طيب ليه ؟ قالت اسطوانة الغاز خلصت , طبعا أشيلها على كتفي عشان ابدلها في نفس اللحظة تقولك بالله حبيبي خذ الزبالة معاك وانت نازل , وجيب معك غدا وانت راجع و بسرعة عشان نودي الولد المستشفى تعبان, طبعا تركب السيارة فيها روائح غريبة , تلقى حفاظه داخل درج السيارة وقيء تحت الكرسي وشنطة السيارة مليانه فيها عربيه أطفال وسيكل وشوية العاب .
طبعا رحلات وسفر على الخطوط الجوية انسى منها , لأنه بدل التذكرة الوحده أربع تذاكر , فلازم تروح بالبر , يا الله يالسفر على البر أول ساعة على الخط شاهي وقهوة وسوالف حلوه والباقي كله بكاء وكل ساعة وقف أبي الحمام ولا تشغل المسجل البزران يقومون وسوق بشويش (يعني لا تسرع) نبي ننام , يعني غثى بمعنى الكلمة وتنقلب حياتك قلب والرجال الرجال صدق اللي يصبر عليهم ويحتسب الأجر عند الله .

وأنا ما اقصد هنا الاعتراض على أقدار الله أو الكفر بنعم الله ولكن أوضح الفروق , فالزواج برضه حلو وجميل أن تشعر بأن هناك من ينتظرك في البيت لتجد غداءك جاهز ومنزلك نظيف وملابسك نظيفة وتحتضن زوجتك وأطفالك وترى ضحكتهم وابتسامتهم فينزاح كل التعب الذي بجسدك وكل الهم الذي بصدرك وسرعان ما تعتاد على هذا النظام وتتعلم معنى قولة تعالى ( المال والبنون زينة الحياة الدنيا .. )
فأما المال فجميعنا نعلم زينته وما يستطيع فعله المال سواء كنت عزابي أو متزوج .
ولكن البنون لن تعرف زينتهم إلا عندما يرزقك الله بالأطفال وأول ما ستتعلمه هو مقدار حب والديك لك مهما فعلت بهم
وثاني شي تتعلمه هو :- أن ابتسامة أطفالك لا تساوي حتى  أموال الدنيا كلها .
وأسال الله القوي الكريم الرحيم القادر على كل شي أن يرزق كل من حرم من نعمه الأطفال الذرية الصالحة بأسرع وقت .
يهمني رأيكم وتعليقكم على الموضوع .

والسلام عليكم ورحمة الله وبركاته